ف دعمها للحق ف الإجهاض.. بيلي إيليش من فوق لاسين ف تكساس: حنا حرات ف أجسادنا – فيديو

استغلات المغنية الميريكانية بيلي إيليش (Billie Eilish) الحفل الكبير في مهرجان "أوستن سيتي ليميتس" (Austin City Limits festival) في ولاية تكساس باش تعبر على رأيها ضد القرار اللي تبناتو تكساس مؤخرا وفالمقابل عبرات أيضا على دعمها لحق العيالات في الإجهاض وف حرية أجسادهم واختياراتهم.
المغنية العالمية وملي كملات الغنا ديالها قالت قدام كلشي "عيت من الرجال القدام.. ماتبقاوش تدويو بلسانا حنا البنات على أجسادنا، ماتبقاوش تقررو في المصير ديالنا".
وتبارطاجات بشكل كبير جملة قوية من بين الكلام اللي قالتو فوق لاسين (My body, my f**king choice).
ووضحات بيلي أنها كانت ناوية تلغي الحفلة ديالها بسباب الصداع اللي نايض على قانون الإجهاض الجديد في ولاية تكساس اللي دار بزاف الجدل.
القانون اللي دخل حيز التنفيذ فالمنطقة كيمنع على العيالات يديرو الإجهاض من بعد 6 سيمانات ديال الحمل.