كشفت جريدة "الكونفيدانسيال" الاسبانية ان ابراهيم غالي زعيم البوليساريو اللي كيتعالج ف"لوگرونيو" بجهة "لاريوخا" الاسبانية من نهار 18 ابريل الاخير٬ تخبى فجوج هويات ماشي غير هوية وحدة. الاولى اللي دخل بيها لاسبانيا وهو جواز سفر ديبلوماسي جزائري وهوية مزورة باسم محمد بن بطوش. الثانية كما كشفتها "الكونفيدانسيال" وهي ان هاد السيد اللي قالت اسبانيا باللي دخل باش يتعالج من كورونا وما خبراتش المغرب٬ عندو اسم "محمد بن عبد الله". وظف هاد الاسم فالصبيطار البارح لاربعا 19 ماي 2021 كان رفض زعيم الانفصاليين يوقع تسلم استدعاء للقاضي ليه. دابا عندو استدعاء باش يمثل امام القاضي نهار واحد يونيو وعندو شكايات فيها التعذيب والاغتصاب بالاضافة الى تزوير هويات. هاد الشي مازال القضاء الاسباني ما وجه ليه حتي شي تهمة. الجزائر كتضغط بقوة باش يخرج فحالو وما يمثلش قدام القاضي. هاد الازمة كانت سبب ما شهدته سبتة وعندها تبعات خطيرة. وهاد المعطيات الجديدة غادية تزيد تشعل العافية بين دولتين كلشي واقف بيناتهم.
