الكونفدرالية الوطنية لجمعية الاباء واولياء التلاميذ كتطالب بتأجيل امتحانات الباك حتى لنهاية يونيو.. ورئيسها ل"كود": ماعندش الأساتذة الوقت باش يكملو المقرر

بعد إصدار وزارة التربية الوطنية للأطر المرجعية المحينة، استعدادا لإجراء امتحانات البكالوريا ف8 و9 و10 يونيو، خرجات الكونفدرالية الوطنية لجمعية الاباء واولياء التلاميذ تطالب بتاخير الإمتحانات حتى لنهاية شهر يونيو.
وقال سعيد الكشاني، رئيس الكونفيدرالية، أن هذ القرار كيهدف لتقليص البرامج الدراسية استعدادا للامتحانات الاشهادية، لكن واخا هكذاك الاساتذة مايمكنش يلتزمو بهذ الدروس كاملين فوقت وجيز.
وزاد، فتصريحو ل"كود"، أن هذ العام ماشي بحال العام اللي فات، اللي كانو فيه التلاميذ فبداية الموسم الدراسي كيقراو بشكل عادي، "ماشي بحال هذ الموسم اللي بدات بالمشاكل والتعثرات الكثيرة بسباب الوباء"، حسب تعبيرو.
وأكد أن الباك خاصو يحافظ على القيمة الاعتبارية ديالو، وباش يخدو الاساتذة وقتهم فإنهاء المقرر والتلاميذ يلقاو متسع من الوقت باش يراجعو، خاص يتم تأخير الامتحانات ديال الباك.
وقال انه كاينين اساتذة كثار، ففترة التعليم عن بعد، كانو كيعطيو الدروس مرة فالسيمانة او فكل جوج سيمانات، وهذشي خلا كلشي يتعطل.