وحربش يخرج شي حد فكازا. اللي كيتقطعو باغيين قهوة اومبورطي -تصاور

اول ايام رمضان بعد صلاة المغرب كازا كتصفر. كلشي فدارو. لا خيطي بيطي لا غيرها. اللي بغى يشوف برا يخرج راسو وصافي. من الامور اللي بانت فاول نهار بعد لفطور هو ان اللي كيتقطعو من الگارو غير هرسو فطورهم وخرجو كيقلبو على قهوة اومبورطي قبل من الثمنية. اي قبل البق ما يزهق فشوارع كازا.
صحاب لقهاوي اللي قليل فيهم اللي كيخلص ضرائب ولا كيخلص للي خدامين عندو الضمان الاجتماعي قاليك طالع فيهم الدم. هاد الفئة فيها انتهازيين كيهمها فقط مصالحها. بلاد كلها ممكن توقف ومنظومتها الصحية ممكن تنهار ايلى طلعو حالات كورونا وهما مصدعينا: غادي يوقف افلاس لينا ووو.
لبلاد ايلى بغات تزطط راسها خاصها هاد الشهر تزير مزيان مزيان. ايلى جاتنا شي عشرة المليون من اللقاح ودرناها ممكن من بعد يطلق المغرب بشوية بشوية ولكن بعد العيد..