الدق فدرب غلف. اكبر عمليات تفتيش على تهريب الايفوات فاكبر سوق ليها هادي 10 ايام ومسؤولين كبار خداو لانتريت وشراو محلات غادي يدخل فيهم التران واخا كينوعرو

https://www.facebook.com/1292968250744243/posts/5107745232599840/?vh=e&d=n
علمت "كود" ان شبكة الايفون الدولية اللي طاحت مازال كتفاجئ. وفق مصدر "كود" فالفرقة الوطنية للشرطة القضائية اللي خدامة على الملف كاينة كثر من 10 ايام فاكبر سوق للهواتف واللوحات الالكترونية: درب غلف فكازا.
وهادي يومين تعززات هاد لبريكاد البارح لخميس بوصول محمد الدخيسي، والي الأمن المدير المركزي للشرطة القضائية ومدير مكتب الإنتربول بالمغرب. براسو غادي يشرف على هاد العملية وعلى عمليات اخرى.
وفق مصدر "كود" هاد الشي جا بعد ما حاولو شي مسؤولين سابقين فمؤسسات مهمة فالدولة يدخلو فهاد القضية. هاد المسؤولين عندهم محلات فدرب غلف او مشاركين فيها وبغاو يؤثرو على تعليمات الوكيل العام بطنجة وتحريات اجهزة الدولة الامنية المتخصصة
هاد الشبكة اللي طيحاتها الديستي فاللول بدات ف8 فبراير فميناء طنجة المتوسط. تم اعتقال لحد الان 21 شخص منهم عراقي وسلعة فقيمة 600 مليون سنيتم داخلة بطريقة غير قانونية.
دابا كيقلبو على 6 لخوت عندهم محلات فدرب غلف وهربانين. هاد الشبكة الدولية لقاو عندها فاللول 2496 تلفون و51 مگانة و7 الحواسيب و18 طابليت و12 لوحة مفاتيح...و4 طونوبيلات وتنشط فمدن كازا والرباط وطنجة.
الدولة باغية تحارب الجريمة المنظمة العابرة للقارات. هاد التلفونات كتشفرو من بريطانيا ودول اوربية وحتى امريكا