حتى الدزاير زادو فالزيت.. وشركة سيفيتال خرجات تبرر: هذو عوامل خارجة عن إرادتنا

بحالها بحال المغرب، حتى الدزاير عرفات ارتفاع فأسعار الزيت بواحد الشكل ملحوظ.
وبسباب هذشي، شركة سيفيتال ديال زيت المائدة، حولات، اليوم الأربعاء، تعطي تبريرات على هذ الزيادة، وقالت فبيان ليها أن هذشي "خارج على إرادتها".
وكشفات أن هذ الارتفاع "كيشمل أسعار المواد الخام في السوق العالمية، واللي تزامنات مع انخفاض قيمة الدينار مقابل الدولار".
وبالإضافة لفاكتورات تكاليف النقل والتعبئة والتغليف، كان لهذشي تأثير على السعر النهائي دالمنتوجات ديالها، وأكدات أن هذشي ماكيتعلقش بالزيت بوحدها، لكن حتى مجموعة من المنتوجات الخرى.
وفبداية هذ العام، عرفات المواد الاستهلاكية الأساسية فالدزاير ارتفاع ملحوظ فالأسعار، ومن بين هذ المواد الخضر والفواكه واللحوم والبقوليات والمعجنات، وغبرة الحليب والقهوة، والمعلبات ومواد التنظيف، وأسعار زيت المائدة حتى هي طلعات.
وخسر الدينار ف2020 تقريبا 20 فالمية من قيمتو بالنسبة للأورو و11 بالمئة بالنسبة للدولار.