مساخيط الفاكسان.. اللي داروه بلا مايكونو فالليست واش غاتعطا ليهم الجرعة الثانية؟ "كود" جابت الجواب

مساخيط الفاكسان، اللي دارو التلقيح بلا ميكون عندهم الحق وبلا ميكونو ف لاليست اللي موجدة الدولة للناس المعنيين واللي فالصفوف الأولى، واش غايديرو الجرعة الثانية؟.
"كود" جابت الجواب من عند مصدر مسؤول، بحيث قال بلي "غايستفدو من الجرعة الثانية وميمكنش نمنعهم لأن الأمر كيتعلق بالصحة ديالهم".
ولكن في نفس الوقت، هادو غايتعاقبو، كل واحد وكيفاش دار وكيفاش تورط، طبعا كيختلفو من حالة الى حالة.
مقرب من واحد اللي دارو الفاكسان خارج القانون، حكى ل"كود" كيفاش خدا الفاكسان، بحيث القصة بدات فواحد الصباح، تاصل به صاحبو خبرو بلي قلال ناس اللي جاو يديرو الفاكسان، وبلي ممكن تجي وديرو.
"مسخوط الفاكسان" مشا دار تلقيح، ولكن "البق ما يزهق" عند المخزن، وصلات خبارو، ودارو عليه بلاغ.