آش هاد الازدواجية.. كيفاش موقع البيجيدي مافيه حتى خبار على زيارة الوفد الإسرائيلي واخا رئيس الحكومة والأمين العام ديال الحزب وقع إعلان مشترك مع اليهود والسكال استقبلهم فالمطار

الموقع الرسمي ديال حزب العدالة والتنمية ما فيه حتى خبار أو إشارة ولو صغيرة على حدث زيارة الوفد الإسرائيلي الأمريكي، واخا حضرو ليها اعضاء من حزب المصباح، وعلى راسهم سعد الدين العثماني، رئيس الحكومة والأمين العام ديال الحزب.
موقع البيجيدي، وعلى غير العادة، ماتكلمش على هذشي نهائيا، واخا لبارح العثماني وقع بيدو على اعلان تعاون مشترك بين المغرب وامريكا وإسرائيل، ورئيس جهة الرباط سلا البيجيديست، عبد الصمد السكال، استقبل الوفد فالمطار، وهذشي واخا ديما الموقع كيحط أخبار على الأنشطة اللي كيكونو فيها اعضاء الحزب، وخصوصا رئيس الحكومة.
وحتى فالصفحات الرسمية ديال العثماني والسكال، وباقي صفحات البيجيدي عامة، ما فيهم حتى إشارة على زيارة الوفد الاسرائيلي البارح، والاتفاقيات اللي توقعو فيها.