من زلزال الحسيمة لأزمة كورونا.. الفنانين والمشاهير كيعزيو فصلاح الدين الغماري – تصاور

خلف الموت ديال الإعلامي صلاح الدين الغماري صدمة قوية عند لمغاربة، لي جاهم الخبر بحال الصاعقة وكأنه واحد من عائلتهم اللي توفى.
الأخبار ديال الموت المتتالية في الأيام الأخيرة كان ليها وقع كبير على نفوس لمغاربة عامة، والموت ديال صلاح الدين الغماري كان ليه وقع خاص، خصوصا أنه دخل للبيوت ديال لمغاربة كاملين في فترة الحجر الصحي لي كان كيدير فيه الغماري برنامج "أسئلة كورونا".
وكيف كاع البيوت المغربية، الأنستگرام حتى هو تحول لبيت نعي وعزاء في صلاح الدين الغماري من طرف المشاهير لي عبروا على الصدمة ديالهم من وفاة إعلامي دوزيم.
ونشروا بزاف ديال الفنانين تعزيات في الغماري منهم أسماء لمنور لي كتبت "كيفاش غادي نقول لولدي آدم أنك كتب"، والممثلة جميلة الهوني لي كتبت "من زلزال الحسمية لأزمة كورونا صلاح الدين الغماري دائما كان حاضر".
ومن بين الفنانين لي عزاو في صلاح الدين الغماري، حاتم عمور، ورقية ماغا، ونجاة الرجوي، وسعد لمجرد، ورفيق بوبكر، وحنان الإبراهيمي، وحماقة، ورشيد رفيق، واللائحة طويلة.