الحصيلة الوبائية لكورونا فالجهات هذ الصباح: الإصابات فبؤرة السردين انخافضو.. تسجلات غير 52 حالة جديدة فمراكش آسفي

فحدود العشرة ديال هذ الصباح، وحسب النسب المئوية اللي عطات الوزارة، تسجلات 52 إصابة جديدة بفيروس كورونا المستجد فجهة مراكش آسفي، وهذا كيعني أن أن عدد الإصابات الجديدة ببؤرة معمل السردين فآسفي بدا يقلال، وهكذا وصل عدد الإصابات فالجهة ل2582.
بالنسبة للجهات الأخرى، سجلات طنجة تطوان 28 إصابة جديدة، ووصل المجموع فيها ل2659، وسجلات العيون الساقية الحمرا وجهة كَلميم واد نون 12 حالة، ووصل المجموع فيهم على التوالي ل688 و97 مصاب، بينما سجلات جهة فاس مكناس 6 إصابات، ووصل المجموع فيها ل1556، وجهة كازا سطات سجلات 4 إصابات، ووصل المجموع عندها ل43667.
وحسب نتائج حساب النسبة المئوية اللي عطات الوزارة، فاحتمال وارد تكون تزادت إصابة جديدة فكل من الجهة الشرقية وجهة الرباط سلا، وهكذا كيوصل المجموع فيهم ل2004 و221 على التوالي.
بينما الجهات الأخرى اللي بقات ماسجلاتش إصابات جديدة هذ الصباح، وبالتالي بقى عدد الإصابات فيهم فالمجموع كالآتي: جهة درعة تافيلالت 586، جهة بني ملال خنيفرة 152، جهة سوس ماسة 92، وجهة الداخلة واد الذهب 16.
ولنا عودة من الوضعية الوبائية للجهات والأقاليم فالعشية.