المغرب حطم الرقم القياسي فعدد الإصابات بكورونا من نهار بدات الجاية عندنا.. 539 تصابو و76 تشافاو.. الطوطال: 9613 و8117 متعافي و213 متوفي و457 حالة كولها فبؤرة لالة ميمونة

علنات وزارة الصحة على تسجيل 539 إصابة بفيروس كورونا المستجد فهاد 24 ساعة الأخيرة، وهذي أعلى حصيلة يومية كيسجلها المغرب منذ ظهور الجايحة، وهكذا وصل عدد المصابين فالمجموع ل9613.
وقالت مسؤولة فوزارة الصحة، فالندوة اليومية للترصد الوبائي لفيروس كورونا المستجد، أن جهة الرباط سلا القنيطرة هي اللي سجلات أكبر عدد ديال الحالات (457)، وكتتعلق كلها بالبؤزة المهنية ديال عاملات الفريز "الالة ميمونة"، وكلهم بدون أعراض، وتم تسجيلها من خلال تعزيز الكشف في الوحدات المهنية بالجهة وفالمغرب كامل.
بالنسبة للجهات الأخرى، سجلات مراكش آسفي 29 إصابة، طنجة تطوان 27، كازا سطات وفاس مكناس 13 حالة فكل جهة، بينما باقي الجهات ماسجلات حتى إصابة.
وتسجلات 76 حالة شفاء اليوم، ووصل المجموع ل8117، بنسبة تعافي د84,5 فالمية.
وما تسجلات حتى وفاة اليوم، واستقر الطوطال ف213، بنسبة إماتة د2,2 فالمية.
وارتفع عدد المصابين اللي تحت العلاج ل1283، منهم 10 فالإنعاش.
ووصل مجموع الحالات المستبعدة ل496023 بعد ما خرجات تحاليلهم سلبية.
وهذا التوزيع الجغرافي للإصابات بالنسبة المئوية: