تصابو فيه كثر من ثلاثين شخص بكورونا.. السلطات سدات مارشي الجملة دالحوت فكازا

عرفات "كود" من مصادر مطلعة أن السلطات المحلية فكازا قررات تسد سوق الجملة دالحوت، ابتداء من اليوم الإثنين 25 ماي حتى للإثنين فاتح يونيو 2020، بعدما تم اكتشاف بؤرة وبائية جديدة فيه.
وحسب المصادر ذاتها، فالأمر كيتعلق بأزيد من ثلاثين حوات خرجو نتائج تحاليلهم إيجابية، وهذ الرقم مرشح للارتفاع بحيث تم تتبع المخالطين ديالهم، وعائلاتهم، بالإضافة لإجراء تحاليل خرى لعشرات التجار اللي البعض منهم مازال ما ظهرات نتائجهم لحد الساعة.
السلطات المحلية عقمات السوق مزيان، وغاتحرص على احترامو لشروط السلامة والوقاية الصحية بشكل متشدد بمجرد ما يرجع يخدم من جديد.
سوق الجملة دالحوت هو المصدر الرئيسي اللي كايزود الحواتة بهذ المادة الغذائية الأساسية فكازا والنواحي، وبالتالي ساكنة هذ المنطقة غيصبرو شوية، حيت يقدو مايلقاوش الحوت الطري كايتباع هذ السيمانة.