حصيلة كورونا ف24 ساعة: 45 تصابو و90 تشافاو وحتى واحد مامات.. فالطوطال وصلنا ل 6652 و3400 تشافاو و190 توفاو

علنات وزارة الصحة على تسجيل 45 إصابة جديدة بفيروس كورونا المستجد فهاد 24 ساعة الأخيرة، وبالتالي وصل عدد المصابين بالفيروس فالمجموع ل6652.
وقال محمد اليوبي، مدير مديرية الأوبئة ومحاربة الأمراض فوزارة الصحة، فالندوة المخصصة لرصد الوضعية الوبائية اليومية في المغرب، اليوم الجمعة، انه تم الكشف على المصابين بالفيروس من خلال عملية تتبع المخالطين، بحيث 39 حالة من الإصابات الجديدة تم الكشف عليها بهاد الطريقة، وماعندها حتى أعراض.
وكشف اليوبي انه أغلب المصابين اللي تسجلو اليوم كاينين فكازا وطنجة، حيت فاللولة بانت بؤرة صناعية جديدة، وفالثانية كاينين جوج بؤر عائلية، وأكد ان البؤر الوبائية مازال كاينة ولابد من اتخاذ الحيطة والحذر.
وبالنسبة لحالات الشفاء، 90 واحد تشافاو اليوم، ووصل الطوطال ل3400، بنسبة شفاء ديال 51,1، وقال اليوبي ان عدد حالات الشفاء ولا كيفوت نهار بعد نهار عدد الحالات النشيطة اللي تحت للعلاج .
وبالنسبة للوفيات، اليوم مامات حتى واحد بالفيروس، وبالتالي استقر عدد الوفيات ف190 حالة، بنسبة إماتة ديال 2,9 فالمية.
واستبعدات المختبرات اليوم 3649 حالة محتملة، وبلغ عدد الحالات اللي خضعو للتحاليل وخرجات نتائجهم سلبية 74964 حالة.
وهذا توزيع الحالات حسب الجهات: