شفتو فين وصلنا. غباء قنصل المغرب فوهران باش قال وسط الجزائر: هنا فبلاد عدو. ديبلوماسي جزائري: تصريحات خطيرة غير مسؤولة وغير مقبولة

ازمة شعبية اولا قبل ما تتحول ديبلوماسية ما محتاجينهاش تسبب فيها قنصل المغرب فوهران اليوم الاربعاء. قال بوضوح ففيديو مع مغاربة بغى يقنعهم باللي خاصهم يصبرو واللي حتاجوه يجيو عندو ياخدوه "حنا فبلاد عدو". كيقولها وعارف باللي وحدين كيصوروه. لا ما عرفش راه غبي ما يستحقش يكون حتى موظف صغير فهاد القنصلية.
هاد الشي قلنا دار ازمة شعبية. شوفو غير وسائل التواصل الاجتماعي فالجزائر كيفاش شعل وكيفاش صحفهم تقلقو علينا بزاف بزاف.
هاد شي خلى وزارة الخارجية الجزائرية ترد على عبر "كل شيء عن الجزائر" النسخة الفرنسية. فقد قال ديبلوماسي جزائري "هاد التصريحات خطيرة وغير مسؤولة وغير مقبولة" واضاف الديبلوماسي الجزائري ان من مهام شخص بحال القنصل يمارس مهامه في الجزائر ان يساهم في تقوية علاقات الصداقة مع البلد اللي كيمثلو وفق روح اتفاقية جنيف حول العلاقات الديبلوماسية
هاد الشي داز ازمة مجانية ماشي وقتها مع الجزائر. دابا هاد الاخطاء عندها علاقة بالتدبير الكارثي للخارجية لملف لمغاربة اللي حصلو برا. غاديين قناصلة يديرو اخطاء اكثر. الملف خاصو يتحل وبسرعة