أمين الراضي: العيالات بطلات.. ولي كيقول الكَلاس فالدار ماشي خدمة يجي عندي ندوي معاه -فيديو

أشاد الكوميدي أمين الراضي بالقدرات ديال الأم ديالو في المطبخ وقدرتها بحال بزاف ديال العيالات لي كيخدمو بزاف للاسف في رمضان، بلا مايعاونهم حتى واحد.
أمين الراضي نشر فيديوهات كوميدية على حسابو في انستگرام ، بغى يوصل بيهم ميساج على ان لمرا في الدار بطلة.
وقال أمين الراضي بأنه گلاس المرأة في الدار هو خدمة كبيرة ولي "كيقول ان الگلاس في الدار ماشي خدمة يجي ندوي معاه".
هادشي طبعا، ماشي نيگاتيف، وكيف كنقولو في المغرب "اللهم العمش ولا العمى"، ولكن مازالين بعاااد، بعد خيالي، على المرا والراجل متعاونين بجوج في الدار على الميناج والطياب وتربية الدراري.. ومازال بزاف ديال المغربيات، خيارهم الوحيد هو يگلسو في الدار يشقاو، عوض تكون عندهم كاريير او مهنة او قراية.. ومنهم لي خدامات وواخا هكاك تمارة ديال الدار هازينها بوحدهم! ولهذا هادشي خاص يتبدل والعقلية الذكورية تنقارض، والرجال يخملو على كمامهم وينوضو من الصالون للكوزينة، يبينو انهم حتى هما ابطال، اما "المرا في الدار بطلة" والواحد مجبد وهي كتشقى، ماعندها معنى.