ما عرفو المتابعين شكون يتيقو.. عدد الإصابات بكورونا اللي علنات عليهم الوزارة فجهة فاس مكناس ومختالف على العدد اللي علنات عليه المديرية.. وها التوضيح

عدد الإصابات بفيروس كورونا اللي علنات عليه المديرية الجهوية ديال فاس مكناس لا علاقة ليه مع الرقم اللي حطات وزارة الصحة فالموقع ديالها بخصوص الجهة، والمتتبعين فالصفحة ديال المديرية على موقع التواصل الاجتماعي "فيسبوك" تخربقو ومابقاو فهمين والو.
فبينما علنات الوزارة، فالبوابة الرسمية ديال رصد تطورات الإصابات بالفيروس، على 448 إصابة فجهة فاس مكناس، تحدثات المديرية على 463 إصابة فالصفحة ديالها الرسمية، وهذ الحصيلات بجوج كيتعلقو بالستة دالعشية ديال اليوم الإثنين.
المديرية الجهوية ما سكتاتش وحاولات تصحح قدر الإمكان، والتوضيح اللي قدماتو المديرية فهذ الصدد هو أنها دارت تحديث من بعد تحديث الوزارة مع الستة، بمعنى حسبات إصابات جديدة فهذ الوقت بعدما دازت ندوة الوزارة وتم الإعلان على الحصيلة اللولة، وهذشي علاش وقع اختلاف فالأرقام.
لكن فالأصل خاص المديرية تعلن على الأرقام والمعطيات اللي عندها فنفس الوقت مع الوزارة، وإلى بقاو شي إصابات زايدة تخليهم حتى لغذليه، باش مايوقعش هذ التخربيق، حيت كاينين جوج أوقات خاص المديريات الجهوية تعلن فيهم على الإصابات بالتزامن مع إعلان الوزارة، واللي هوما العشرة دالصباح والستة دالعشية، وهذشي باش مايوقع حتى شي خلط، ويحيرو الناس ويدوخو مع الأرقام.
ولحد الساعة ماشي كاع الجهات علنات فهذا العشية على تفاصيل الإصابات فالأقاليم ديال 24 ساعة الأخيرة، بعد قليل غانحطو المعطيات المتوفرة ف"كود".