وكالة المغرب العربي للانباء دايرة خدمة واعرة. وليدات خليل الهاشمي فايتين طاقتهم باش يقدمو اعلام عمومي مزيان

مواكبة مميزة دايرها وكالة المغرب العربي للانباء خلال هاد الحايجة اللي ضربات العالم ومنها المغرب. من نهار بدات اولى الحالات فالمغرب وهاد الوكالة الرسمية كدير خدمة متميزة. كاينة المواكبة فيها المادة الاخبارية فيها الربورطاج فيها الحوار. يعني اجناس صحافية كثيرة كيخدموها. باينة بصمة المدير العام خليل الهاشمي فهاد الشي. صحافي مسكون بهاد المهنة حد الجنون وكاتب فنان.
باش جات الجايحة طلقو كذلك "اليوم المغربي" بالفرنسية وبالعربية. جريدة حقيقية من 24 صفحة فيها اخبار بتبويب زوين. مفوجة فقرايتها. فيها نسخة عربية وفرنسية. بقات مجلة "الباب" اللي دارت بلاصتها وكيدير خدمة مزيانة فيها الاجناس الراقية فالصحافة.
هاد الشي دارو خليل الهاشمي والناس اللي معاه بنفس الفريق بنفس عدد الصحافيين. ما تزادش صحافيين جداد.
فهاد الفترة طلع كذلك انتاجات سمعية بصرية منها "الو لاماب" ومحتويات جديدة قصيرة وذكية ونقل ومواكبة لكاع اللي كيدار هاد ليام فالمغرب من النقل المباشر للندوات ديال مدير مديرية الاوبئة محمد اليوبي كل نهار مع الستة حتى ربورطاجات يومية وحوارات.
من الفقرات اليومية اللي مزيانة هي المخصصة للفايك نيوز: صحيح او خطأ. مساهمة من هاد المؤسسة فمحاربة الفايك نيوز.
واخا الوضعية المالية للوكالة ماشي مريحة بينو صحافيوها وتقنيوها باللي بحب المهنة وطبعا البلاد ممكن دير المستحيل.
خدمة بحال هادي مهمة للصحافة بشكل عام فالمغرب. كتعطي صورة مشرقة. اييه صحف كثيرة رقمية وورقية كتقاتل وتخدم باش تقدم خدمة اعلامية فالمستوى. هاد الشي مهم لدولة عنها مشكلة فتعاملها مع الصحف.