فايك نيوز. ورقة الخروج بيها يمكن تستافد من المعاونة راها غير اشاعة خلقات موشكيل كبير هاد الأيام وتسببات في تجمعات كبيرة قدام المقاطعات والمقدمية فهاد جايحة كورونا

إشاعة كبيرة بزاف بخصوص الورقة ديال الخروج خلقات البلبلة هاد ليام وتسببات في تجمعات كبيرة خصوصا في الأحياء الشعبية، وخلات كولشي كيقلب على المقدم ومجوقين عليه في خرق واضح للحجر الصحي.
الإشاعة كتقول أن أي واحد عندو الورقة ومابقاش خدام أو محتاج غادي يستافد من المعاونة ديال الفين درهم فالشهر، يكفي أنه يجيب لاكارط ناصيونال ويلتاحق بالمقاطعة التابع ليها، هاد الإشاعة خلات الناس كاع هاد ليام يجوقوا قبالة المقاطعات في رحلة بحث يومية على المقدم.
ورقة الخروج راه مافيها لا معاونة لا والو، ولي شدها مكتعنيش أنه وللى محمي من فيروس كورونا ويبقى عاطيها لخيطي زيطي، الورقة الهدف منها هو تبير الخروج للحاجات المهمة فقط، لأن الأصل هو الواحد ماخاصوش يخرج نهائيا باش يحمي راسو من الفيروس.