من بعد عام وشهر على الغبرة لي غبرات بسباب حمزة مون بيبي.. مريم سعيد رجعات فزمن كورونا -فيديو

المنشطة المغربية مريم سعيد لي كانت أولى ضحايا ملف "حمزة مون بيبي" لي متابعة فيه ابتسام باطمة وسكينة گلامور وعايشة عياش، وبزاف ديال الأشخاص في حالة اعتقال، رجعات للنشاط ديالها في انستكَرام من أجل بلادها المغرب، بعد غياب دام عام وشهر.
المقدمة السابقة في قناة "ام بي سي" حطات البارح السبت فيديو فيه النشيد الوطني المغربي وكتبات دعوات باش بلادنا يتجاوز هاد المحنة ديال فيروس كورونا مع كل نهار عدد المصابين كيرتفع.
مريم سعيد كانت غبرات بشكل قطعي وكلي من شهر فبراير 2019 واختارت تبعد على العالم الافتراضي والواقعي حتى هو، بعدما تخلات عليها القناة حيت حساب حمزة مون بيبي حط ليها تصاورها الشخصية من داخل بيت نعاس، ونسخة الباسبور ديالها.
عودة بنت أكادير للانستكَرام باش تعبر على تضامنها مع المغرب في هاد الجايحة، عجب المتتبعين ديالها لي وجهو ليها التحية.