المغنية أسماء لمنور تبرعات لصندوق مكافحة كورونا وقالت: الوطن واقف علينا كاملين واخا تعطي غير ثمن القهوة لي كتمشي ليها

بزاف ديال المشاهير والفنانين ساهمو في صندوق مواجهة كورونا لي دارو الملك محمد السادس، واللائحة انضمات ليها المغنية أسماء لمنور لي تبرعات بمبلغ ديال 10 المليون سنتيم.
لمنور لي من نهار دخلات كورونا للمغرب خصصات صفحاتها في مواقع التواصل الاجتماعي باش دير التوعية، حطات البارح الجمعة بوسط فانسكرام ديالها فيه الوثيقة باش تبرعات وكتبات التفاصيل ديال العملية وطلبات من الناس كاملين يتبرعو، كل واحد بداكشي لي قد عليه.
وقالت لمنور "الحمد لله أمس وفقني الله باش ندير تبرع للصندوق الخاص لمكافحة وباء كورونا . قالو ساهل ندير بالتطبيق ولكن ختكم على قد الحال في التكنولوجيا . عيطت على الوكالة البنكية وتجاوبوا معايا وتم تسجيل المعاملة بالهاتف بلاما نضطر نخرج من داري".
وأضافت "الناس لي دارو التبرع للصندوق نتمنى ينشروه بنفس الطريقة ما بقا ما يتخبى الوطن واقف علينا كاملين واخا تعطي غير ثمن القهوة لي كتمشي ليها ومتبقاش بلاش . هذا واجب و يشهد الله انّه خالص لوجهه الكريم وما نشرته لكم إلا دعوةً لكم للاستزادة في الخير".
ودارت المغنية تحدي جديد، وطلبات من كل واحد ينوميني ثلاثة ديال الناس، ماشي ضروري يكونو مشاهير، وقالت " خاص اي انستكَرام ندخل ليه نلقاه داير نفس الشيء على قدر المستطاع ومكرهناش شوية اكثر من المستطاع".
ووضحات أسماء أن إرسال المال للصندوق مكيعنيش توقف برنامج كفالة الأسر واللي غادي يكون عن طرق أحد الجمعيات.