علاش ما يدخلش الجيش ويسد كاع المدن وتسد الاجواء حتى نوقفو هاد “كورونا فيروس”

خطاب وزير الصحة خالد ايت الطالب هادي شوية كيخلع. كنا يمكن محتاجين لخطاب صادم باش نزيدو نزيرو. المغرب دار التدرج ودابا بان هاد الشي ما كانش كافي. ما سدش الحدود ديالو فالوقت المناسب ودخلاتنا “كورونا فيروس” فاللول كانت غير من الاجانب. دابا حسب تصريحات وزير الصحة بدات كتنتاشر بين المغاربة.
فتنا المرحلة الاولى ودخلنا للمرحلة الثانية واخا كان فيدينا نبقاو فديك المرحلة الاولى. دابا خاص تعامل اخر. خاص اغلاق المدن كيف دارت دول علنات على حالة الطوارئ بحال اسبانيا وايطاليا. اللي خاص يدخل دابا هو الجيش. هاد الشي اللي واقع فدول اوربية.
الجيش خاصو يدخل فكاع المدن. بلا هاد الشي العدوى غادية تكثر وغادي يولي عندها بؤر ل”كورونا فيروس”. الميساجات البيداگوجية اللي كدير تحسيس للمواطنين سالى وقتها باش ولينا فالمرحلة الاولى. دابا خاص القانون اللي كيناسب هاد المرحلة. اللي خالف الخروج يخلص غرامة كبيرة او يتابع. فاسبانيا الغرامة كتوصل 600 مليون فحالات قصوى.
الحكومة كتحمل مسؤولية كبيرة فهاد الوضع. قالت باللي تم تعليق الرحلات فالمغرب وخلات رحلات دولية من اوربا من امريكا. دارت رحلات لمواطنين اجانب رجعو لديورهم. جات رحلات من ايطاليا فطيارات خاصة. هاد الشي ما كانش خاصو يكون.
دابا خاص الاجواء المغربية تسد. حتى طيارة ما تبقى تدور. خاص النقل اللي ما كيهمش السلع والحالات القصوى يوقف. خاص المدن تسد حتى هي. خاصنا نحبسو هاد الفيروس قبل ما يهجم علينا. ديما قلنا خاصنا الوقاية. الوقاية. ايلى وصلنا العلاج غاديين ننهارو. ماشي حنا لا ايطاليا لا اسبانيا اللي عندها نظام صحي من بين 10 احسن انظمة فالعالم حسب منظمة الصحة العالمية وفشلو.