الكلاخ والتخلف كون كانو بنادم.. المقرئ المغربي خالد رياض سحابليه راسو عالم وكيفهم فالعلم: المنقبات أقل عرضة باش يتصابو بفيروس كورونا

كيقول واحد المثل لفقيه لي نتسناو براكتو دخل للجامع ببلغتو. هادشي لي دارا لمقرئ خالد رياض لي قال أن المنقبات أقل عرضة يتصابو بفيروس كورونا لأنهم مغطيات.
خالد رياض نشر ستوري عامر كلاخ وتخلف، كيقول فيها أنه المنقبات مغطيات وما كيسلموش وما كيصافحوش وهادشي لي كتوصي بيه الوقاية الصحية لتجنب مرض كورونا.
التعاليق نزلات على المقرئ، والأغلبية بانلهم جاهل ونقص من المرأة عوتاني بطريقة غير مباشرة وحتى بعد لبنات طنزو عليه وقالو ليه واخا ها حنا غادي نديرو النقاب باش ما نمرضوش.
مانعرفت فوقاش ناس بحال هاد السيد غادي يتعلمو يزمو فمهم ومايهدروش فحاجات كبار عليهم، ويخليو العلم والعلماء يفسرو للناس كيفاش كتنقل كورونا وكيفاش الوقاية منها.