شوهة برنامج ليلى الحديوي.. جابت بلوكَوز وقلبوها معاطية وسبان فانستكَرام والقضية فيها الغش وتسلاف الحوايج -فيديوات

البلوكَوز خدوج بلخياط وفرح فابيان قلبوها صباط، وماكاين غير المعاطية وحشيان الهضرة بعد مشاركتهم في برنامج “سيدات الشوبينكَ” لي كتقدمو ليلى الحديوي على “دوزيم”.
في واحد السيمانة، الحديوي جمعات 4 ديال صحاباتها لي مشهورات في انستكَرام “خدوج بلخياط المعروفة “دوجة”، وفرح فابيان، وصفية تازي وبثينة بنسودة، وخلاتهم يتنافسو على لقب “سيدة الشوبينكَ”.
لي وقع أنه ومن بعد 5 اشهر على التورناج، خدوج وفرح تخاصمو ولكن ماقدروش يدويو حيت سانيين عقد، وتسناو حتى دازت الحلقة النهائية هاد السيمانة وهوما يبداو المعاطية.
خدوج لي دات اللقب قالت أن فرح تسلفات الصبابط من عند صحاباتها باش تبين الدريسينكَ ديالها عامر ومستف، وأنها مرضاتش تخسر حيت هي قارية على لاموض.
فرح ناضت جاوبات خدوج وقالت ليها بأنها قولباتها بعدما تافقو مسبقا باش كل وحدة تعطي لاخرة 10 نقط باش تربح، لكن خدوج نفات هادشي وأكدات أنها تعاملات بصدق وعطاتها النقطة لي كتستحق.
ووصفات فرح خدوج بالمسمومة، وقالت ليها أن البرنامج فرشها وبينها على حقيقتها، وأن حياتها مرونة.
وفي الأخير البرنامج كامل لا يستحق، ومكيحققش نسبة مشاهدة محترمة.