فقهاء مغاربة كاينصبو بالسماوي على المسلمات الفرنسويات

حكمات محكمة مدينة ليون الفرنسية على جوج د النصابة مغاربة بعقوبات تراوحت مابين 6 اشهر موقوفة التنفيذ وعامين نافذة.
هاذ النصابة كانو دايرين عصابة تستهدف المسلمات المقيمات بفرنسا من اجل السطو على المجوهرات ديالهم بخطة تجمع بين السماوي و الشعوذة.
النصابة و بعدما كايرصدو الضحية تايبداو ف تنفيذ الخطة بتوزيع محكم للادوار، حيث يتقدم العنصر الاول من الضحية باش يسولها على طريق الجامع و بعدما كاتوريه الطريق كايبدا يقدم ليها راسو على انه فقيه عندو القدرة على تحياد السحر من المجوهرات، و ف نفس اللحظة كايوقف عليهم العنصر الثاني اللي كايدير راسو كايعرف الفقيه و كايطلب منو يدعي مع شي مريض ساكن معاه، قبل ما يرجع لنفس البلاصة ويبدا يشكر الفقيه على المعجزة اللي دار و تمكنه من شفاء المريض.
و هنا كاتبلع الضحية الطعم و كاتوافق باش الفقيه يحيد ليها السحور من المجوهرات ديالها، و من اللي كاتيجيبهم كايطلب منها تمشي تحيد السحور من تحت حجرة كاينعتها ليها و بعدما كاتنفذ هاذ الطلب كايعطيها الفقيه صاكا مسدود كايقول ليها ان فيه المجوهرات ديالها و كايشرط علها ما تحلو تا توصل لدارها، لتكون المفاجأة فاش كاتحل الصاك من بعد انها كاتلقى في حجر و قطع معدنية ف بلاصة المجوهرات اللي خذا ليها النصاب و صاحبو.