بالفيديو: بونو فحوارو مع “كود” على واش المنتخب تراجع؟ : كنبنيو منتخب مزيان وعشت فترة فالمنتخب باللي كتمشي ليه بحال ايلى كتمشي لمنتخب الهواة

دابا كاينة هدرة كدور على مستوى المنتخب المغربي لكرة القدم. غالبا اللي كيهدرو كيكونو بعاد. ماشي اللعابة. اجيو نشوفو راي واحد من لعابة الاسود الحارس ياسين بونو.
بونو فحوار حصري مع “كود” من اشبيلية اللي التحاق بناديها “اف سي” قال انو كيستغرب من الهدرة على تراجع اداء الاسود. وقال ل”كود” “اش من تراجع. راني عشت فترة فالمنتخب باللي كتمشي ليه بحال ايلى كتمشي لمنتخب الهواة. دابا ولى عندو ثقل واخا خرجنا من كاس افريقيا الاخيرة بديك الطريقة ولكن راه ماشي داك المنتخب اللي كان ما كيتاهلش او ما كيقدرش يدوز حتى الدور الاول”.
ثم اكد ل”كود” ان الاجواء دابا مزيانة. المغرب كيبني منتخبو. عندو باش “المنتخب المغربي كيبني ففقريق وكاينين لعابة مزيانين. لعابة شباب”واوضح ان المستقبل كاين فيه ماتشات كيوجدو ليهم مزيان. “الماتشات الجايين مع افريقيا الوسطى وماتش مع موريتانيا فيونيو خاصنا نوصلو ليها بمعنويات عالية باش نربحو. دابا ما بقاوش فراقي صغار فافريقيا. كلهم عندهم تنافسية وعندهم قوة”.
الفوز فماتشات مع منتخبات كبيرة او صاعدة… خاص “الواحد يوجد ذهنيا باش يكون واجد خصوصا فافريقيا” يؤكد بونو ل”كود”.