علاش كيقلب منصف بلخياط. كيفاش ولى مالك 51 بالمائة فمجموعة اعلامية دخلات فيها “ليزيكو واللي معاها. حلم هاد الوزير باغي تلفزة والمواقع والجريدة غير مساعد ليها

منصف بلخياط ولى اهم مساهم فمجموعة اعلامية جديدة قبل ما يسالي هاد العام. فمن خلال شركتو “كروس وورد” ولى كيملك 51 بالمائة بعد اندماج مواقع اخبارية لهاد هاد الشركة و”ساهام ميديا فوند” اللي كانت كتملك “لزيكو” و”اوريزون تيفي”. ساهام غادية تبقى عندها 34 بالمائة فيما باقي اسهم المجموعة الجديدة غادية تكون موزعة بين “سانام” ديال سعيد لعلج والصحافي سمير شوقي.
هاد الشي اللي وقع اعتابروه مالين الشي “تحالف استراتيجي”. طبعا كلام كبير وصافي فهاد العملية. هاد المجموعة دابا فيها “لوريزون تي في” و”ليزيكو” والموقع ديالها و”لوسيت انفو” بالعربية والفرنسية و”هولا” وشي تخربيق اخر كيطلقوه باش يبينو باللي مجموعة كبيرة مؤثرة.
بعد هاد الشي منصف بلخياط هو الرئيس المدير العام ليها وعادل البصري المدير العام المكلف بالتدبير ومهدي علابوش اللي ختارو كمال لحلو يمشي للصين باسم فيدرالية الناشرين المغاربة واخا هاداك كمال ما عندو علاقة بهاد الفيدرالية٬ هاد علابوش غادي يرجع لخدمتو الاولى وهي القسم التجاري وغادي يولي مدير عام منتدب مكلف بالقسم التجاري. المفاجأة اللي ممكن تنوض الصداع هو تعيين هشام بناني مدير نشر المجموعة. الصداع غادي ينوض ف”ليزيكو” اللي اصلا رفضو صحافييها تعيين مديرة نشر مكلفة بها.
هدف منصف بلخياط عضو المكتب السياسي لحزب التجمع الوطني للاحرار هو يدير قناة. هاد المشروع كان هادي سنوات. كان باغي يديرها مع عثمان بنجلون. الصراع لكبير ديال الهمة والماجيدي باش كل واحد ياخد تلفزة٬ دفعات بالهاكا ديك الوقت ما يعطي حتى تلفزة. دابا الوقت تبدلات وهاد المشروع غادي يخرجو بلخياط.