اتحاد طنجة جرا على المدرب نغيز

اتحاد طنجة جرا البارح الجمعة على المدرب ديالو الجزائري نبيل نغيز ، كرد فعل على إقصائه من ربع نهائي كأس العرش، بعدما انهزم أمام حسنية أكادير بواحد لزيرو بملعب طنجة.
مسؤولو اتحاد طنجة طلبوا من المدرب الجزائري ما يجيش الأونتطربمو گاع، لحقاش كاعيين عليه بزاف، وگالوا ليه تستنا حتا نعطيوك فلوسك.
هاد الإقالة ما كانتش مفاجئة بالنسبة لجمهور اتحاد طنجة، لأنه أصلا كان كيطالب بإبعاد هاد المدرب من فترة طويلة، لحقاش ماراضيش على الخدمة، لي دار منين جا لفريق اتحاد طنجة.
مسؤولو الفريق انتظروا حتا تقصاوا من كأس العرش عاد طيروا المدرب، لأنه ما حقق حتا شي نتائج، لي تخلي الجمهور يصبر عليه شوية.
النتائج الخايبة بدأت من بداية الموسم، إذ أقصي فريق البوغاز كذلك من الدور التمهيدي من مسابقة كأس محمد السادس للأندية العربية.
اتحاد طنجة بدا كيقلب على مدرب جديد يقدر يكون مغربي، خصوصا بعدما فشلات التجربة مع جوج ديال المدربين الدزايرية، وهما عبد الحق بن شيخة ونبيل نغيز.
.