شوهة. منتخب الصامبا بهدل الحداوي واولادو في الألعاب العالمية الشاطئية.. خسر بتسعود

المنتخب الوطني للكرة الشاطئية خدا قتلا من منتخب السامبا وخسر بنتيجة كارثية ومعيتة في الألعاب العالمية الشاطئية المنظمة في قطر.
الهزيمة أمام منتخب البرازيل المدجج باللعابة الكبار يمكن نعتبرها عادية، لكن ب9 أهداف لواحد نتيجة ما شي مقبولة، وخاص الجامعة الملكية المغربية المغربية تراجع أوراق هاد المنتخب، لي جايب ليها غير صداع الراس وتضياع الفلوس.
ما شي معقول يخسر منتخب الشاطئية، لي ارجع مرتبط بالمدرب مصطفى الحداوي واولادو أكثر من ارتباطه بالجامعة الملكية المغربية لكرة القدم.
شنو الهدف من منتخب وطني كيتشوه فبطولات عالمية وماكيناش بطولة وطنية، لي يمكن تخرج لعابة مزيانين يشرقوا الجامعة.
الغريب أن الحداوي ما حقق حتا نتيجة مشرفة منذ تعيينه مدربا للمنتخب الوطني، لي كتصرف عليه الملايين دون فائدة تذكر. خاص الجامعة تعيد النظر في هاد المنتخب وتنظم بطولة وتدير تغييرات تقنية رآه ما شي معقول يبقا الحداوي محتكر المنتخب الكرة الشاطئية وما شي بعيد يورثوا للمقربين منه، خاص فوزي لقحع رئيس الجامعة يتدخل ويوضع حد لهاد التسبب وإلا غادي نبقاو تخسروا ب10 و11.