بلهندة ارجع بزربة.. بدا التداريب ببروطيج على وجهو وباغي يلعب الديربي

يونس بلهندة، لاعب غلطة سراي التركي والمنتخب الوطني، ارجع بزربة للتداريب، واخا مهرس فالفك ديالو، ودار عليه عملية جراحية
فاتح تيريم، مدرب غلطة سراي عجبو الحال، لأنه عارف قيمة الدولي المغربي فوسط التيران.
بلهندة ما شي ارجع للتداريب أو صافي، بل عبر على رغبتو باش يلعب الديربي كونتر فنربخشة التركي نهار السبت الجاي، لي كايلعب فيه الدولي المغربي نبيل درار.
اللاعب المغربي دار البروطيج على وجهو، خوفا من احتكاكه مع أي لاعب، خصوصا وأنه مازال ما براتش ليه الضربة، وتحدى تقرير الطاقم الطبي ورجع يتريتي، باش يكون واجد نهار السبت جاي.
عودة بلهندة ما فاج0تش غير المدرب تيريم، حتا الجمهور وصحابو فالفرقة ما كانوش كيتوقعو يرجع بزربة، خاصة أن طبيب الفريق حدد مدة غيابو ف45 يوم.
المدرب تيريم ما كيشوف حتا شي مانع باش يكون بلهندة فالديربي إلى دار الواقي، لأنه ما شي ممنوع. وأكد “ما شي مشكل يلعب ولكن يقدر يلقا صعوبة بالتنفس. لهذا خصصنا ليه بروطيج خاص”.
واخا ارجع للتداريب وقرقتو غلطة سراي، لكن غادي يكون صعيب يشارك مع المنتخب المغربي فالماتشات ديال ليبيا والغابون.
.