لا لاواه يديرو لينا هاداك اللي سميتو البحري مكلف بتقييم 20 عام لحكم الملك. اش هاد التفاهة وشكون عطاه الاذن يدير صفحة باسم رئيس الدولة ويسول هاد السؤال

ديما قلناها ونعاودوها. رئيس الدولة اللي هو الملك محمد السادس راه رئيس الدولة. ما خاصش لشي حد يستغل اسمو او صفتو لا فالفايس لا فالحياة العادية لا فالعالم الافتراضي. دابا هادي سنوات وداك المسمى سفيان بحري داير صفحة محمد السادس. اييه مازال عندو. كيعطيوه بعض المرات صور ما دايراش. اللي كيدير هاد الشي كيمس بمكانة رئيس الدولة وكيمس بهبة الدولة.
هاد النكرة ناض قال ليه المخ ديال راسو ايلى عندو شي مخ وباغي يدير تقييم ل20 عام من حكم محمد السادس. سول “واش الوضع الاجتماعي فالمغرب؟ مستحسن ام لا”. وعاطهم يجاوبو ب”نعم” وب”لا”. اييه شفتو الزعامة فين وصلات.
ماشي مهم التخربيقة دالسؤال المهم الوقاحة اللي طرحو. اواه واش هاد لبلاد ما فيهاش ناس يرجعو امثالو لوضعهم. كيفاش كيدخلو فامور كبيرة عليهم.
لاواه ديرو هاد النكرة سفيان بحري منسق مكلف بتقييم عشرين عام ديال حكم السادس گاع. وعشرين عام راها ديال التقييم.