جمعية حقوقية: مُولْ معصرة الزيتون فتاونات بلغ بقايد بغا الرشوة و السلطة كتضغط عليه يتنازل

omarelmouzaine@gmail.com
المبلغين على جرائم الفساد كيواجدو التضييق. هادي حوالي 20 يوم كان تشد القايد ديال قيادة عين عائشة بتاونات بعد ضبطه متلبسا بالارتشاء، بعدما تم التبليغ عنه من قبل واحد مول المعصرة ديال الزيتون ف الرقم المباشر لي دارتو رئاسة النيابة العامة.
هاد مول المعصرة (أ.م)، حسب الرابطة المغربية للمواطنة وحقوق الإنسان، كيتعرض للتهديدات بالقتل من طرف مرات هاد القايد لي حتى هي قايدة فتاونات، وحتى رئيس جماعة عين معطوف ناض كيضغط على المشتكي باش يتنازل للقايد وقاليه أن السلطات والعمالة ديال تاونات مباغيّينش هادشي.
وقررت الرابطة الحقوقية تنظيم وقفة تضامنية مع زوال يوم غد الثلاثاء مع مول هاد المعصرة، معلنة أنها غادي تراسل رئيس النيابة العامة و وزير الداخلية قصد التدخل العاجل للحماية المادية والمعنوية من كافة التهديدات التي يتعرض لها جسديا وفي مورد رزقه قصد إخراسه وجعله نموذجا لمن سولت له نفسه التبليغ عن الفساد.
كما أدانت الرابطة، في بيان لها، توصلت به “كود”، استمرار بعض المنتخبين ورجال السلطة في التعامل بمنطق تضامني مع الفاسدين والمبتزين.