خاص.. ها باش كمل الاجتماع ديال الحكومة مع شركات المحروقات..الوزير الداودي ل”كَود”:خاصهوم يتصالحو مع المغاربة

علمت “كود”، أن الاجتماع اللّي دارو لحسن الداودي، الوزير المنتدب لدى رئيس الحكومة المكلف بالشؤون العامة والحكامة، عصر اليوم الخميس، مع الشركات ديال المحروقات، دام لأزيد من 3 ساعات واتفقو فيه على بزاف ديال الأمور.
وفي أول خروج له، بعد الانتهاء ديال هاد الاجتماع، قال الوزير الداودي، في تصريح ل”كود: “دوزنا شي 3 ساعات ديال لمضاربة لكن فالعموم الاجتماع كان مزيان وانا اقترحت عليهوم ينقصو 60 سنتيم ونتمى يستاجبو لهاد الاقتراح ديال الحكومة أو غادي اندير شغالي”
وكشف الوزير الداودي أن هاد الشركات غادي يوجدو لجنة ديالهوم السيمانة الجاية وحتى الوزارة غادي ادير لجنة ديالها باش يكون توافق على هاد الاقتراح، مضيفا: “بطبيعة الحال مغاديش يكونو هاد الشركات كولهوم موافقين على هاد الاقتراح لكن لي مدارش هادشي غادي نعرفو نتعاملو معاه”.
وزاد الوزير الملكف بالحكامة، في ذات التصريح، قائلاً: “هذا امتحان عن هاد الشركات وهادي فرصة باش يتصالحو مع المغاربة حقاش الصورة ديالهوم خايبة عند المغاربة وهادشي قولتوليهوم وخاصهوم يديرو شي جيست”.