انفراد. ها الحالة ديال الضحايا الثلاث للبحرية والسلطات ماباغياهومش يموتو بأي ثمن وممنوع شي واحد يهضر مع الصحافة

تكتم كبير من طرف جميع المسؤولين حول الحالة الصحية ديال الشباب الثلاثة لي تضربو بالقرطاس من غير حياة لي ماتت ودفنوها اليوم مع العصر.
وحسب مصادر كود فإن جوج ضحايا لي كانو فالمضيق حالة واحد فيهم مستقرة والتاني خرج من السبيطار، والبارح داروليهم جوج عمليات، طبيب العظام دار ليهم العملية مع الستة دلعشية، وجابو طبيب ديال الجراحة الصدرية من طنجة مع الطناش دالليل باش يدير ليهم العمليات.
وزادت مصادر “كود”، أن طبيب واحد ديال الجراحة الصدرية لي كاين فالمنطقة ديكشي علاش جابوه بشكل استعجالي باش ينقذ الشابين.
الشاب الثالث لي نقلوه بعجالة عشية أمس الثلاثاء للرباط كاين حاليا فمصلحة العروق، حالتو مستقرة من بعد ماكانت خطيرة بزاف.
المصادر أكدت ل”كود”، أن وزارة الصحة أعطت تعليمات مشددة بزاف على المسؤولين باش مايتواصلو مع الصحافيين، وممنوع يتسرب شي خبر للصحافة بالاضافة للقيام بجميع المجهودات لإنقاذ الشباب الثلاثة ومايموت منهم حتى واحد.