بالصور: تفاصيل حصرية على الخلية الارهابية ديال اليوم مع الصباح وتطلق القرطاس باش يشدوهم. 11 ارهابي من فاس ومكناس وخريبكة وكازا ودمنات وسيدي قاسم وها لائحة اسلحتهم اللي بغاو يرجعو المغرب حمام دم وكلشي كان موجه باش يضربو

حصلت "كود" على تفاصيل حصرية بخصوص الخلية الارهابية اللي تشدات هاد الصباح السبت 14 اكتوبر 2017. وفق معطيات "كود" فان عدد افرادها 11 من فاس ومكناس وخريبكة وكازا وزاوية الشيخ ودمنات. هاد الخلية ماشي ساهلة. خطيرة وخطيرة بزاف٬ فاف بي اي المغرب التابع للمديرية العامة لمراقبة التراب الوطني ضربو القرطاس باش يشدو اعضاءها ففاس. ما مات حد ما تصاب حد.
ووفق المعطيات اللي مازال ماشي نهائية اللي حصلات عليها "كود" فانه تم حجز لحد الان فواحد الدار فشارع الجيش الملكي بفاس وفيها كانو كيعيشو جوجت الارهابيين من الخلية المفككة: 3 لفرادا و2 موكحلات الصيد و150 قرطاسة ديال الفردي و219 قرطاسة ديال الموكحلة كاليبر 12 ملم وبزافت لمواس والسيوفا و4 ديال الماتراك فيهم جوج ايليكرتريك و7 ديال قنابل مسيلة للدموع فيها 4 من الحجم الصغير وشي جوجت المليون و87 الف ريال و4 ديال الايكتينكتور و12 بوطة غاز 190 غرام واجهزة اتصال وكاع المواد لصنع متفجرات وحتى الحزام اللي باغيين يديرو فيه المتفجرات كان عندهم