ما بقا فرق بين المطار والزبالة. صورة لمطار سايس كتبين أن عندنا مشكل كبير مع النظافة

مطار فاس سايس اللّي كان دشن الملك محمد السادس فيه واحد المحطة جوية ارجع بحال الزبالة هاد الأيام. انعدام النظافة وكاين مشاكل كثيرة بزايد فاستقبال المسافرين سيما الجالية المغربية المقيمة فالخارج وغيرها من الأمور التي تتطلب بإجراء بحث من قبل المكتب الوطني للمطارات ومساءلة مدير المطار اللّي مداير حتى شي حاجة.
“كود” حصلت على واحد الصورة توثق هاد لفضايح اللّي كيعرفها مطار فاس سايس. عدد من المسافرين اللّي كانو غاديين فرحلة جوية من مطار فاس سايس لمطار مراكش المنارة على الساعة الرابعة عصرا من يومه الجمعة 21 شتنبر الجاري، تفاجئوا بعشرات القنينات ديال الماء مليوحة حداهوم وأمام أعين المسؤولين.
ماشي غير هادشي. كانو بزاف ديال السياح اللّي تابعو داك المشهد الخايب وكاين فيهوم اللّي ناض يصور الشوهة. هادشي حشومة يكون فمطار بحال فاس سايس، سيما أن الملك عاد دشن فيه واحد المحطة جوية جديدة.