فرنسا مشات بعيد: رئيس البرلمان و الرجل الثالث ف الحكم الحبيب المالكي حتى هو توصل باستدعاء من القضاء الفرنسي ف قضية مصطفى أديب

قال “موقع اطلس انفو” ان رئيس مجلس النواب الحبيب المالكي حتى هو استدعاتو محكمة فرنسية بالاضافة الى اربعة صحفيين مغاربة اخرين ف اطار قضية رفعها مصطفى اديب ضدهم كايتهمهم بالقدف بعد نشر مقالات صحفية كتعلق على زيارتو للمستشفى اللي كان فيه الجنرال الراحل بناني .
وهاد القضية شعلات ازمة صامتة بين المغرب و فرنسا حيث المحكمة الفرنسية صيفطات الاستدعاءات مباشرة بلا ماتحترم المساطر و الاتفاقيات القضائية بين البلدين و دارت بجال الى الصحفيين تابعيين ليها سياديا او هما مواطنين فرنسيين الشي اللي خلا الحكومة تستدعي قاضي الربط اللي كايكون ف السفارة الفرنسية باش تاخد منو توضيحات وخا هو ف الاصل بحال هادشي خص استدعاء السفير الفرنسي براسو.
مصادر الموقع كتقول بلي الحبيب المالكي اللي كايتعتبر الرجل الثالث ف نظام الحكم ف البلاد توصل بالاستدعاء الغريب حتى هو ولكن بصفته مدير نشر يومية ليبراسيون الاتحادية اللي تنشرات فيه المقالات اللي كايعتبرها القبطان السابق مسيئة ليه، و هادشي ماشي صحيح حيث الي كان مدير النشر حينها هو خيرات وليس المالكي اللي ترأس الاعلام الحزبي بعد يناير 2015
هاد القضية الغريبة د الاستدعاءات المباشرة ديما كاتخلق ازمات بين فرنسا و المغرب وكان اخرها محاولة محكمة فرنسية استدعاء رجال دولة مغاربة بينهم الحموشي ف قضية رفعها ملاكم مغربي ولا حتى هو معارض للنظام