الشراف البيدوفيليين جهلو هاذ اليوماين .3 ديال حالات الإغتصاب والضحايا أطفال وقاصرين

تعرضو مجموعة ديال الأطفال هاد اليوماين ،لإعتداءات جنسية ، أغلب المعتدين إذا ما قلنا كلهم ، مسنين فايتين الخمسين سنة .
الحالة اللولة هو طفل فعمرو 13 سنة ، تعرض للإغتصاب بزاف ديال المرات بعدما غراه صاحب ضيعة فلاحية سبعيني بتشغيلو فحي “دو تركا” بتيزنيت بمقابل مادي ، لكن هاذ البيدوفيل قام بإغتصابو بالعنف داخل الضيعة و هددو بأوخم العواقب إذا فضحو ، وداوم على إستغلالو بعدها جنسيا وكيخلصو بحالا خدم باش يسكت.
الحالة الثانية هي طفلة فعمرها 9 سنوات ، قام خمسيني بيدوفيلي بإغتصابها بدون رحمة فجماعة “تيديلي” بإقليم الحوز ، وتم إعتقال الجاني وإعترف بالمنسوب إليه ، ومن المنتظر يتم عرضو على أنظار الوكيل العام بجنايات مراكش يوم غد الثلاثاء .
أما الحالة الثالثة فهو طفل قاصر تمكن من الهروب من بين يدين بيدوفيل فعمرو 52 سنة وكيخدم كحارس سيارات “غارديان” ، بحيت كيعمد على تخدير أطفال قاصرين وكيغتاصبهم بالعنف ، داخل شقة ديال أحد أقاربو فعمارة سكنية بالقرب من “مديرية التعليم” ، بالحي الإداري فطنجة ، وتفتاضح أمر إغتصابو للأطفال القاصرين بعدما تخديرهم بمادة كيتم إستنشاقها بالأنف ، فاش تمكن قاصر من الهروب فأخر لحظة قبل مايهتك البيديوفيل العرض ديال ، ولفت إنتباه سكان العمارة لي تاصلو بالإسعاف وبوالد الضحية لي جا فالحين .