سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
حدث الاسبوع. واش تفاجأ الناطق الرسمي باسم الحكومة بسؤال حول طلاق الملك وواش ردو ما كانش فمحلو؟ كود” تقدم معطيات حصرية على كيفاش كيتوجد لقاؤو الاسبوعي الخلفي ل”كود”: عارف حدودي وكنوقف عندها وكنوجد كلشي مع رئيس الحكومة
خلال الندوة الاسبوعية للناطق الرسمي باسم الحكومة مصطفى الخلفي الخميس الماضي خرج صحافي مغربي كيخدم فوكالة “ايفي” الاسبانية بسؤال ما مولفينش عليه. مطروح فوسائل التواصل الاجتماعي هادي مدة ولكن ما قرباتش ليه الصحافة المغربية وهو خبر نشرته “اولا” الاسبانية حول طلاق رئيس الدولة الملك محمد السادس والاميرة لالة سلمى. الخبر حيح فالصحافة الاسبانية كلهم خداوه على “اولا” حقاش قالت مصادر مقربة من القصر فخبارها. الصحافي سول على صحة الخبر. الناطق الرسمي مصطفى الخلفي رد فالاخير على الصحافي قال ليه سير سول القصر الملكي. علاش قال هاد الشي؟ حسب الخلفي ل”كود” فانه ناطق باسم الحكومة واكثر من هادا “عارف حدودي وعارف فين كنوقف”. في سؤال حول ما اذا حس بالاحراج من هاد السؤال رد على “كود”: “ما تحرجتش ما تفاجأتش بالسؤال حقاش كيدير كل اسبوع اسئلة محتملة واخا خارجة عن نطاق العمل الحكومي” طبعا كل ما يتعلق بالملكية سواء ما نص عليه الدستور او ما يهم اخبار الملك والامراء هاد الشي ما عندو علاقة بيه. وفق الخلفي فالناطق باسم الحكومة كيجاوب على اختصاصو اما الاسئلة المرتبطة بالملكية وبالقضاء وبالجيش وبالبرلمان فهاد الشي ما يمكنش يعلق عليه. ولكن كيفاش كيدير باش كيوجد خدمتو؟ الخلفي كيجي للندوة بعد المجلس الحكومي باش يعرض علاش تمت مناقشته والمصادقة عليه فكل مجلس. طبعا اسمها ندوة صحافية يعني ممكن يكونو اسئلة. الناطق الرسمي كيوجد وفق مصدر “كود” قائمة بالمواضيع اللي كتهم قطاعات حكومية شهدت نقاشا خلال الاسبوع الاخير كاحداث جرادة او افادة كولر المبعوث الخاص للامين العام الاممي الى الصحراء او موضوع الارث. طبعا هاد الشي كلو كيتهم بتنسيق مع رئيس الحكومة. قبل كل لقاء صحافي كيتم التداول فكلشي حتى الاسئلة المحتملة وكيڤاليدي كاع الاجوبة قبل الندوة. واش كاينين شي قطاعات كيتم فيهم التسنيق اكثر؟ اييه كاين قطاعات الداخلية والخارجية والمالية والعدل وطبعا خاص ديما الناطق الرسمي يعرف اش قالو الوزراء او الوزارات على المواضيع باش ما يكونش تناقض فالاجوبة. هادا مهم بزاف. طبعا بعد كل ندوة صحافية مباشرة٬ وفق مصدر “كود”٬ يتم رفع تقرير شفوي الى رئيس الحكومة واخا هاداك الشي كيتنقل مباشرة وكيتنقلو وسائل الاعلام.
