بعد ما شاف حظوظو ما كايناش ف"بنك المغرب": الفعفاع باغيين يعوضوه بمريم بنصالح فالباطرونا

قالت مصادر ل"كود" من الاتحاد العام لارباب المقاولات بالمغرب انه يجري التنسيق باش يكون خليفة مريم بنصالح الرئيسة الحالية اللي غادية تسالي ولايتها فشهر ماي. يتعلق الامر وفق مصدر "كود" بوزير الخارجية السابق واللي دوز قبل المالية وقبلها الصناعة والتجارة وعطاوه حزب التجمع الوطني للاحرار صلاح الدين مزوار.
يبدو ان هاد الترشيح لحد الان عندو داعمين من اعضاء الاتحاد خاصة بعد اعلان خالدة عزبان للي كانت عندها حظوظ كبيرة تاخدها بانها لا تريد هذا المنصب ولا ترغب فيه.
منصب الباطرونا كيحددوها الشركات لكبيرة وهاد الشركات راضيين على مزوار واخا هو ماشي باطرون ديال حتى شي حاجة. كان كيسير شركة للنسيج ودخل لهاد الفيدرالية وبها خدا العضوية.
ترشيح مزوار غادي يسد الطريق قدام حيفظي اللي عندو دابا رئاسة فريق الباطرونا فمجلس المستشارين واللي طمع فهاد المنصب واعتاقد باللي دعم الياس العماري رئيس البام ليه كافي باش يفتح ليه الطريق. تلميذ البصري ومدير ديوانه السابق عندو لانطير قديم وما اكتياليزاهش