زلزلهم وبنعرفة وصحابو وصحاب صحابو ما غادي يجيهم نعاس: بنكيران ربح كلشي خاصة تيار الاستوزار. من حقو يترشح لولاية ثالثة

صوتت لجنة المساطر والانظمة التابعة للمجلس الوطني لحزب العدالة والتنمية قبل قليل على تعديل المادة 16 من النظام الاساسي للحزب واللي على قبالها يمكن للامين العام الحالي للحزب =بنكيران= الترشح لولاية ثالثة. التعديل صوت عليه 21 عضوا مقابل معارضة 11.
هاد التصويت لكبير جا ضد مطامع تيار الاستوزار اللي كان ضد هاد التعديل وباغي يسالي مع مرحلة بنكيران ويجمه ويطوي.
دابا قدام الامين العام الحالي للحزب فرصة كبيرة باش يتقدم فمؤتمر الحزب المقبل اللي غادي يكون فدجنبر والطريق معبدة لانتصار ثالث.
هاد التعديل جا بعد يومين من خطاب الملك امام البرلمان. الحزب اختار الانتصار لديموقراطيته. زلزال كبير غادي يوقع لتيار الاستوزار ولاكثر من جهة حزبية وغير حزبية بهاد القرار.
وحقاش الخير جا بالمرة حتى المادة 37 تغيرات وهادي كتقيد انضمام الوزراء للامانة العامة. اي خداو مسافة كبيرة بين الحكومة وبين الحزب.
هاد التعديل غادي يتعرض على المجلس الوطني اللي غالبا ما يكون فنونبر واللي غادي يحسم فيه ومن بعد يعرض على المؤتمر المقبل ديال دجنبر وتصبح رسمية