وفين افريقيا فحكومة بن عرفة العدالة والتنمية؟ وفين خطاب داكار وعلاش كالو باللي المشكلة مع بنكيران فالبرنامج الحكومي والهيكلة ولكذوب لكبير

حكومة ابن عرفة العدالة والتنمية سعد الدين العثماني طلعات ماشي كيف وعدونا. نبداو وحدة وحدة. محمد السادس فعيد المسيرة سادس نونبر 2016 دار خطاب من داكار حدد كيف خاص تكون الحكومة. هاديك الساعة كان عبد الاله بنكيران هو المعين المكلف بتشكيل الحكومة. الملك بغى "حكومة جادة ومسؤولة"
وطلب من السياسيين باش "لا ينبغي أن تكون مسألة حسابية، تتعلق بإرضاء رغبات أحزاب سياسية، وتكوين أغلبية عددية، وكأن الأمر يتعلق بتقسيم غنيمة انتخابية".
واضاف باللي باغي "الحكومة هي هيكلة فعالة ومنسجمة، تتلاءم مع البرنامج والأسبقيات. وهي كفاءات مؤهلة، باختصاصات قطاعية مضبوطة"."وسأحرص على أن يتم تشكيل الحكومة المقبلة، طبقا لهذه المعايير، ووفق منهجية صارمة. ولن أتسامح مع أي محاولة للخروج عنها".
ودابا فين هاد الشي فالحكومة. فين هي الجادة والمسؤولة. كلها حسابات سياسية ناضت وزيعة بين الاحزاب السياسية الستة وكلشي قلب على اغلبية عددية ورجعات "غنيمة انتخابية"
اذن هاد الشي ما كاينش.
نقطة اخرى هي الملك قال باللي افريقيا خاصها تكون حاضرة. فين هي فالحكومة. فين هي فهاد القارة ياك قالو غادية تكون شي كتابة دولة مكلفة بالقارة الافريقية. علاش هاد الصداع.
ثم فين هاداك لكلام ديال عندنا خلاف مع بنكيران على الاولويات على البرنامج الحكومي على الهيكلة. علاش هاد الشي كلو ما كانش فهاد الحكومة وكلشي دخل فيها. شفتو كيفاش دارو لبنكيران الصابونة وجابو بن عرفة العدالة والتنمية كيقلب كلشي