شوفو! راه كلشي نتافقو عليه ،و كلشي ندوزوه بجغيمة دلما زيدو علينا فالمازوط ! غليو علينا فالبصلة، سلخو الاطباء وزيدو عليهم تا الاساتذة و لي دوا فرشخوه، إلا هاد القضية ديال الإسلام ماشي هو الحل ! لا يعقل تنعس و تفيق و تجي تفركع علينا قنبولة فحال هادي ! لا يعقل نعيشو حياتنا كاملة وحنا عارفين أنه الاسلام هو الحل ! قريناها فالمدارس ! سمعناها فالزنقة و نفيقو اليوم نلقاو الاسلام ماشي هو الحل ؟ ! نتوما نيت !لاش مصوتين عليكم الناس ؟حيت قلتو ليهم الاسلام هو الحل ، وي سي فري ! ماقلتوهاش هاكا طاي طاي فحال خوتكم فمصر ! ولكن قدمتو راسكم على أساس نتوما صحاب قال الله قال الرسول لي غاتجيو و تجيبو معاكم قيم الاسلام و عدل الاسلام و حق الاسلام و نعيشو فحال يامات عمر بن عبد العزيز! المزلوط فينا يدير لاباس و المظلوم يرجع ليه حقو و المكلخ يقرا و القاري يخدم و يشري دار فالضحى و يدير ضاسيا مازوط و يلقى "البائة" باش يتزوج و ينقص معدل السيدا فالمغرب ! فا الله يجازيكم بيخير ماتفلاوش علينا ! ماتبيعوناش العجل ! الاسلام هو الحل و غايبقا الحل ! كيفاش ماشي حل ؟و اجتماعيا لا جينا نشوفو الاسلام عطا حلول واقعية و منطقية لجميع المشاكل الاجتماعية لي عندنا ! شوف "المرأة" مثلا! كاين شي دين عطاها حقوقها اكثر من الاسلام ؟ و كاين شي حق احسن من الحق فla sieste مع الجوج مورا ماتكوني سيفطتي ولادك للمدرسة ؟ كاين شي حق اكثر من انك تعيشي معززة مكرمة فدار راجلك ماتفيقي مع الثمنية دوزي امتحانات ! ماتقاتلي باش ديري كاريير بروفيسيونيل ! ماتزاحمي تانتي مع بعرور على طرف د الخبز فالشركات و لوزينات ! الاسلام ماطالب منك والو كمرأة من غير أنك تكوني قانتة في بيتك حافظة لفرجك!فين كاين شي دين متساهل مع المرا مامبزز عليها تقرا ماطالب منها تخدم؟ تهلا فراسها و تربي ال*ر و البزازل و تعلم الوصفة د كيكة بدانون بنان و تلوي الشباكية فرمضان باش تكون امرأة مسلمة حقيقية ! فين تلقا المرا شي دين فحال هاد الدين لي ماطالب منها والو من غير أنها تكون مصبنة كواشها ! عاجنة خبزها! ناشرة كديدها فالسطح حالا رجليها لراجلها باش تفوز بالجنة؟!بعيدا عن صداع الراس ديال الجمعيات الحقوقية لي فرعو ليها راسها بالعمل و الاستقلالية المادية و المستقبل و الحقوق! واخا المرأة فالدول الاسلامية مقودة عليها هادي 1400 عام و لكن غي حيت مافهموش الاسلام و ماكايطبقوش شرع الله! كيفاش الاسلام ماشي هو الحل و الحل ديال التحرش لي كانعانيو منو اليوم لقاه الاسلام هادي الف وربعميات عام ب السترة و الحجاب و الحل ديال العنوسة هو كل راجل ياخد ربعة د العيالات ! و الحل ديال "الزنى" و الدعارة و الامراض الجنسية هو " الاستعفاف" و " الصيام"! وي بصح البلاد المسلمة لي طليتي عليها غا تلقاها نايضة تشرميل فالعيالات و تحرش و اغتصابات و لكن مرة اخرى راه ماشي الخطأ من الاسلام الخطأ من الناس لي مافهموهش و ماعرفوش يطبقوه! حتى اقتصاديا الاسلام عطا شي حلول لبناء نظام اقتصادي سوي و قوي ،معقووولة، لي مايمكنش الانسان المنطقي العاقل يرفضهم و هادشي بشهادة اعتى الاقتصاديين فالعالم!جهابدة الفينونص و الماناجمنت! شوف غا الزكاة مثلا ، كون كل واحد كان كايخرج الزكاة كورا كاع المزاليط اليوم لاباس عليهم واكلن شاربن ضاحن، كون ماكانش الربا كورا البركة حاضرة معانا! نحيدو الربا و البانكات و نخرجو الزكاة كما يجب و ديك الساعة غاتشوفو الوقت مزوهرة ! و طبعا مايمكنش نهضرو على الاسلام و مانهضروش على الاعجاز العلمي لي فيه ، دوك الاكتشافات العلمية لي كايلقاوها الغرب و لي كلها مجموعة و مذكورة فالقرآن ، الزلازل ! البراكين ! المجموعة الشمسية، الفيزياء النووية ، الذرة ،البوزون دو هيكز، هادشي كلو عندنا و مذكور غي حنا ماعارفينوش كانساينو تايلقاوه ولاد سيدنا عيسى عاد نتلاحو حنا كانغوتو " راه عندنا و الله تا عندنا"! طبيا مثلا ديما فالفايسبوك كانقرا شي معلومات كاتأكد ليا انه كون الواحد فينا يلتزم بتعاليم الاسلام راه موحال يجيه الكونصير ، هل تعلم أن الوضوء خمس مرات في اليوم يقي من سرطان عنق الرحم لدى المرأة ؟ هل تعلم أن الصيام يساعد على تقوية الجهاز العصبي ؟ هل تعلم ان الحركات التي تقوم بها اثناء السجود تساعد على اطالة عمرك؟ و السياسة، الاسلام اسس للديموقراطية قبل ماتبان الديموقراطية ديال جون جاك روسو ، الاسلام دار مبدأ الشورى ! "و امرهم شورى بينهم" واخا كاع الخلفاء الراشدين و الصحابة تقاتلو على السلطة مبعد! و ثلاتة من ربعة الخلفاء الراشدون ماتو مقتولين يا بالسم يا مذبوحين بالسيوفة! و حفدة النبي ولاد بنتو ماتو تاهوما مقتولين و الصحابة طايفو على الحكم من بعد و شلا حروب و دمايات … و لكن حيت للأسف تاهوما ماكانوش فاهمين الاسلام و ماطبقوش مزيان … مايمكنش مورا هادشي كلو ! 1400 عام و حنا كانتسناو الاسلام يقدم لينا الحل ! و يتطبق و نعيشو داكشي لي خليتونا نحلمو بيه ، تجيو نتوما اليوم باش تقولو لينا لا سمحو لينا راه غلطنا حقا ما حقا الاسلام ماشي هو الحل لجميع المشاكل! آ سيدي الاسلام هو الحل ! و الناس صوتو عليكم حيت قلتو ليهم غاتلقاو الحل ! ماشغلناش … ضبرو راسكم!
