بنكيران نجم الفايسبوك عاود ثاني: كيفاش بفوقية وكاس دتاي وحليوات تكسب شعبية

رئيس الحكومة عبد الاله بنكيران كيخلق الحدث واخا ما كيتكلمش. يوما السبت والاحد استقبل ببيته مصطفى بكوري الامين العام لحزب الاصالة والمعاصرة ووفد من حزب الاستقلال يقوده عبد الصمد قيوح وحمدي ولد الرشيد ثم كان اجتماع الاغلبية: صلاح الدين مزوار ومحاند العنصر ونبيل بنعبد الله. القاسم المشترك بين هادو هو انهم كلهم تصورو. صور عطاتنا فكرة على طريقة الاستقبال. بنكيران كان لابس فوقية ديال الدار. لما يستقبل الضيوف في بيته كيلبس الا الجلابة ولا الفوقية البيضاء "هادي كيديرها مع كلشي اللي جا لدارو غادي يلقاه لابس بحال هاكاك" يشرح مقرب منه ل"كود".
بالاضافة الى اللباس كلهم بركو تقريبا فنفس لبلاصة وكلاو نفس الاشياء "الحلوى اللي تحطات مع براد اتاي هي حلوة دارت فالدار. ما شراهاش من برا" يضيف مصدر "كود" والترحيب كان بحال بحال. كلشي كاس دتاي وطبسيل الحلوى.
هذا الامور البسيطة تجعل بنكيران يشبه جميع المغاربة "كاين بعض المرات لقلال كيكون الترحيب مختلف ولكن قليل بحال كاع لمغاربة ايلى مشيتي عندهم لدارهم" يضيف مصدر "كود".
ببراد اتاي وشوية الحلوى كسب بنكيران بزافت التعاطف "كاين اللي كيدير اخراج وكيجيب خبراء فالتواصل باش يدوزو ميساج ديال التواضع. هاد الشي دارو بنكيران بتلقائية وبلا تفكير فهاد الامور وهادي هي قوتو" يشرح المقرب منه ل"كود"