عيالات المغرب بداو كيوجدو لماتش الروتور ضد زامبيا (تصاور)

بدا المنتخب الوطني المغربي لكرة القدم النسوية كيوجد لماتش روتور الدور الرابع المؤهل إلى أولمبياد باريس، ضد منتخب زامبيا الثلاثاء الجاي فالرباط.
ودار المنتخب الوطني المغربي أول حصة تدريبية ملي رجع من زامبيا، وكانت البارح السبت بالليل فمركز محمد السادس لكرة القدم، وعرفت الحصة التدريبية مشاركة اللاعبات اللي ما لعبوش ماتش الألي واللي دخلو احتياطيات، واللاعبات اللي لعبو أساسيات فضل المدرب خورخي فيلدا يخليهم يرتاحو.
وكاينة أجواء زوينة فالمعسكر ديال المنتخب المغربي النسوي، واللاعبات المغربيات باغيين يأكدو رباح الالي فزامبيا بنتيجة 2 لواحد، بالرباح فماتش الروتور الثلاثاء الجاي مع 10 الليل فتيران مولاي الحسن فالرباط، ويحققو تأهل تاريخي وغير مسبوق للأولمبياد.