المبعوث الشخصي دي ميستورا تلاقى وزير خارجية موريتانيا فانواكشوط وها فاش هضرو (تصاور)

Elouali.zaz.1987@gmail.com
تلاقى وزير الشؤون الخارجية الموريتانية، محمد سالم ولد مرزوگ، البارح الثلاثاء الموافق ل2 أبريل 2024، مع المبعوث الشخصي للأمين العام للأمم المتحدة لنزاع الصحراء، ستافان دي ميستورا، اللي داير زيارة مفاجِئة لموريتانيا.
وزير الشؤون الخارجية الموريتانية، محمد سالم ولد مرزوگ، استقبل المبعوث الشخصي ستافان دي ميستورا، مباشرة بعدما رجع من العاصمة السنغالية دكار، واللي حضر فيها رفقة الرئيس الموريتاني، محمد ولد الشيخ الغزواني، مراسيم تنصيب الرئيس الجديد.
ودار وزير الخارجية الموريتانية محادثات مطولة مع المبعوث الشخصي، بحيث هدرو على نزاع الصحرا ومستجداتو والجهود اللي كيدير ستافان دي ميستورا فإطار إعادة إحياء العملية السياسية للنزاع، ومخرجات لقاءاتو مع مختلف أصحاب المصلحة.
اللقاء كان فرصة لموريتانيا باش تؤكد دعمها للمساعي ديال المبعوث الشخصي ستافان دي ميستورا، وكذا تشجيع "مينورسو" ودورها فالمنطقة وتيسير الجو الملائم للهدف اللي باغية الأمم المتحدة وهو إطلاق العملية السياسية، وكذا التأكيد على انخراطها بإيجابية فگاع الجهود اللي دايرة الأمم المتحدة فهاد الملف.
ويذكر أن الزيارة اللي كيدير دي ميستورا لموريتانيا كتجي قبل إنعقاد جلسة مجلس الأمن المغلقة حول الصحراء نهار 16 أبريل 2024، واللي غادي يقدم فيها دي ميستورا إحاطة حول الوضع فالصحرا، بالإضافة للإحاطة ديال رئيس "مينورسو" ألكسندر إيفانكو.