هاد الوزيرة مزور ما صلحات لا ادارة ومادياها فزواجها وناضت بغات عطلة للمغاربة الجمعة واستغلات هاد الشي سياسيا باش سربات مراسلتها لاخنوش

غيثة مزور الوزيرة المنتدبة المكلفة باصلاح الادارة والانتقال الرقمي ما نجحات تصلح الادارة ما قدرات دير الانتقال الرقمي لهاد الادارة. هاد الوزيرة اللي كيهمها حياتها الخاصة كثر من مسؤوليتها الحكومية. ضرباتها بتزويجة ونسات خدمتها يمكن. عوض هاد الوزيرة تديها فالادارة اللي كيعانيو منها المواطنين٬ خلات حتى ليام اللخرة من رمضان ودارت مراسلة لرئيس الحكومة عزيز اخنوش بعنوان "مقترح عطلة استثنائية بمناسبة عيد الفطر".
فهاد المراسلة كتقول راه العيد ممكن يكون لاربعا 10 ابريل او لخميس 11 ابريل وقالت باللي هاد الشي سيطرح بعض الصعوبات امام الموظفين الراغبين في السفر باش يدوزو ايام العيد خارج مدن عملهم. واقترحات باش رئيس الحكومة يعطيهم 3 ايام عوض يومين اي ياخدو الجمعة ايلى كان العيد نهار لاربعا.
دابا مزور استغلات سياسيا هاد القضية باش تبان هي وحزبها الاصالة والمعاصرة اللي واحد من احزاب الائتلاف الحكومي. القضية كانت تداول بين الاحزاب السياسية ويكون قرار واحد عوض ما ترسل مراسلة وتسربها للصحافة ولوسائل التواصل الاجتماعي.
هاد لوزيرة كانت دير خدمتها بصاح وتخرج للادارات فرمضان. راه هادو اللي باغية تعطيهم 3 ايام ما خدموش فهاد الشهر. كانت مزور دور على الادارات وتشوف عذابات المواطنين والمواطنات مع ادارتنا عوض تستغل سياسيا عيد الفطر