فرنسا ما مسروطاش لهم تفضيل بنصغير للمغرب على منتخبهم وكيضغطو عليه باش يخلي الأسود ويلعب مع لفرارج

مازال الفرنسيين ما تسرطش لهم اختيار إلياس بنصغير المغرب، وكيضغطو عليه دابا باش يتراجع على القرار ديالو واخا جا للمغرب ولعب مع المنتخب المغربي 2 ماتشات وديين قبل أيام ضد أنگولا وموريتانيا.
وكشف موقع "فوت ميركاتو" الفرنسي، أن الاتحاد الفرنسي لكرة القدم، مازال ما استسلمش فقضية إلياس بنصغير وطامع باش النجم المغربي يبدل الرأي ديالو ويتراجع عن اللعب للمغرب ويختار منتخب الفرارج.
وحسب نفس المصدر، فالاتحاد الفرنسي لكرة القدم ما مستوعبش أنه خسر واحد من أحسن مواهب الكورة اللي تزادو ففرنسا، زاد من الاتصالات ديالو بإلياس بنصغير باش يغير رأيو وكيضغط عليه باش يتراجع على اللعب للمغرب، وهذا الشي قبل ما يلعب أول جوج ماتشات وديين مع الأسود شهر يونيو الجاي ضد زامبيا والكونگو، حيث إذا لعب هاد الجوج ماتشات غيولي شبه مستحيل يلعب مازال مع فرنسا.