كتسنى أوروبا كلها التحاق المواهب المغربية الشابة بالمنتخب الوطني المغربي والتغييرات اللي غتكون فصفوف الأسود، كشفت تقارير إعلامية فرنسية أن الناخب الوطني وليد الركراكي وضمن التغييرات اللي غيديرها فالمنتخب المغربي خلال المرحلة الجاية، بعد إخفاق كوب دافريك 2023 فالكوت ديفوار، قرر يعطي الفرصة للاعبين شباب وعندهم بلايصهم فالفرق الأوروبية اللي كيلعبو فيها وبالضبط ففرنسا. وحسب موقع "فوت ميركاتو" الفرنسي، فوليد الركراكي غيعيط على كل من إلياس بنصغير لاعب موناكو الفرنسي اللي قرر يلعب مع المنتخب الوطني، ونيل عيناوي ولد أسطورة التنس المغربي يونس العيناوي اللي كيلعب مع لانس الفرنسي. الموقع الفرنسي ما فوتش الفرصة، وهضر حتى على إبراهيم دياز نجم ريال مدريد الإسباني، وأكد أن ولد مليلية وافق واختار يلعب للمنتخب المغربي، واخا محاولات الاتحاد الإسباني معه باش يلعب مع المنتخب المغربي، ولكن الجامعة الملكية المغربية لكرة القدم رادين البال ليوقع شي تحول قبل حسم التحاق ابراهيم دياز بالأسود. وديما ومع نفس الموقع، فأكد أن من بين اللاعبين اللي غيبعدهم وليد الركاراكي بسبب تراجع مستواهم كاين سليم أملاح لاعب فالنسيا وهادشي بان فكوب دافريك الأخيرة فالكوت ديفوار، بحالو بحال سفيان بوفال وأنه غتكون تغييرات جذرية فالمنتخب المغربي، ابتداء من الماتشات الجايين الوديين الجوج ضد أنگولا وموريتانا يوم 22 و26 مارس فأكادير.
