لگلوري: فتحنا تحقيق فالمضاربة بين جمال بن الصديق وريكو وغنعلنو على نتائج لونكيط والعقوبات

تفتح تحقيق فحادث دومي فينال الوزن الثقيل فجائزة لگلوري للكيك بوكسينگ، واللي كانت فيه كومبا بين المغربي نبيل خشاب والبطل الهولندي ريكو فيرهوفن، وملي سالات ناضت مضاربة بين الأخير والبطل المغربي الاخر جمال بن الصديق.
وعلنو المسؤولين ديال منظمة لگلوري، أنه كيديرو دابا تحقيق فالحادث اللي وقع فالحلبة ملي سالات الكومبا، وأكدت المنظمة أن عندها قواعد وقوانين صارمة لگاع الرياضيين والأطقم التقنية ديالهم، وأنها غتنشر نتائج التحقيق والعقوبات المحتملة.
وكان البطل المغربي فرياضة الكيك بوكسينگ جمال بن الصديق، ضارب مع بطل العالم الهولندي ريكو فيرهوفن، حيث بغا يطلعها على المغربي نبيل خشاب فدومي فينال فالوزن الثقيل فجائزة لگلوري الليلة الماضية، وبعدما سالا النزال بين ريكو وخشاب برباح البطل الهولندي، بإجماع القضاة، احتج الطاقم التقني ديال البوكسور المغربي خشاب على الحكام، حيث شافو أنه تظلم من طرفهم، ولكن ريكو ناض وبدا كيتمسخر عليهم ويضحك، وهاد الشي ما تقبلوش جمال بن الصديق اللي كان حاضر كيتفرج فالكومبا، وهو يطلع للحلبة وكان غيسلخ ريكو كون ما فكوه منو.
والبطل الهولندي ريكو اللي ربح حتى الفينال وتوج باللقب، هضر بعد الواقعة، وطلب من المسؤولين على منظمة گلوري، أنهم يجريو على البطل المغربي جمال بن الصديق من المنافسات ديالها حيث طلع للحلبة وبغا يضربو.