من حرب الطباسل للتصرفيق... ها شكون القيادي الاستقلالي لي صرفق برلماني فالمجلس الوطني لحزب الاستقلال

الروينة اللي وقعات البارح السبت فاجتماع المجلس الوطني لحزب الاستقلال، بطلها عضو فاللجنة التنفيذية يوسف ابطوي، بحيث صرفق البرلماني منصف الطوب.
اللي كيجمع البرلماني منصف الطوب (كاتب إقليمي لحزب الاستقلال بتطوان) وعضو اللجنة التنفيذية لحزب الاستقلال يوسف ابطوي هو أنهم بزوج من الشمال، الأول من تطوان والثاني من المضيق.
ابطوي صرفق البرلماني الطوب، فمشهد نادر فلقاءات الأحزاب السياسية، وهادشي لي رجع ذاكرة المتتبعين حادثة الصحون الطائرة (حرب الطباسل) في المؤتمر السابق لحزب الاستقلال فاش ناضت بين أنصار حمدي ولد الرشيد وانصار نزار بركة.
هادي شوهة جديدة لصورة حزب الاستقلال المشارك فالحكومة، وكيستعد باش ينافس على الرتبة الأولى فانتخابات 2026.
هاد التصرفيقة غاتكون ليها أبعاد تنظيمية خايبة حسب مصدر "استقلالي"، بحيث ممكن تهدد بصداع كبير وسط المؤتمر وانهيار الحزب فالشمال.